मीच माझी पंढरी, अन विठ्ठला तू वारकरी..
पाऊले का शोधतो मी
आत माझ्या अंतरी;
सोडुनी जे भंगले ते,
शोध साधक पंढरी!
मीच माझ्या अंतरी मग निर्मिला हा श्रीहरी;
मीच माझी पंढरी, अन विठ्ठला तू वारकरी. ।।१।।
प्राक्तनांचे भोग जेव्हा..
जीवनाला वेढती;
रूध्द मौखिक सांत्वनांची..
त्यात पडते आहुती;
मी न जाणी धर्म कुठला, रिक्त ओंजळ मी धरी; ।
मीच माझी पंढरी, अन विठ्ठला तू वारकरी ।।२।।
दैव हे तव देणगी, अन..
श्वासही तव चेतना;
मुग्धतेचा शापही तव,
जाळते मज कामना;
रोज "जगणे अन जगवणे" हीच वारी मी करी;
मीच माझी पंढरी, अन विठ्ठला तू वारकरी! ।। ३॥
शब्द-शब्दा शब्द भिडला,
गीत उमगे ना मला..
मी न राजा, मी न याचक,
काय मी मागू तुला?
सत्य एकच "सत्व" माझे, का चढ़ तव पायरी?
मीच माझी पंढरी, अन विठ्ठला तू वारकरी! ॥४॥
